إحكي يا رابعه
أحمد غنايم
انا رابعه، إمي ولدتني تحت شجرة زتون، في موسم جداد الزتون إمي حكتلي سنتها ،كانت سنة خير ، وجهك يمه يا رابعه جاب معاه الخير، زتوناتنا كانن يعملن عشر جرار زيت، سنتها عملن الطاق طاقين ،كانن يعملن عشر جرار زتون رصيص سنتها عملن ضعفين ،وسنتها كل غنماتنا جابن ثلاثه، ، وثنتين منهن بس جابن اثنين ، وزاد عنا و عم الخير، و عند كل اهل بلدنا زاد الضعفين ، امي حكتلي وجهك يا رابعه كان خير ، امي حكتلي الحصبه لما كانت تيجي على بلدنا كانت تكش كل المواليد سنتها مرت بخير، امي دللتني و كان عنا ديكين ، امي كانت تذبح الصيصان الديكه و تكبر جاجات البيض، امي علمتني القرآن و ددتني عند الشيخ ، فكيت الخط وانا بعدني ازغيره وتعلمت من الحجر والطين ابني بيت، وكبرت و صار عمري سبعه ، وإمي ما خلفت غيري ، دللتني و عملتلي جدايل ودكت جبيني علامة خير، و حنتلي ايديي ولبستني المقصب و المورد ، و لبس البنطلون عيب ،امي حكتلي وجهك يا رابعه كان خير، والفرس اللي عنا جابت مهرين، والناقه جابت جملين وغنماتنا كثرن وصار عنا حظيرتين،
حوشنا كان كبير وبنينا فيه قنين ، و معرش عنب و من كل الشجر ثنتين ، وكان عنا موارس كثيره و بدل البيدر اثنين ،!!
أحكي يمه ، إحكي يا رابعه يمه والله وجهك خير!!
أبوي أخذني على حيفا و قعد مع متعهد السفينه و قله البياره كثر فيها الخير، بيارتنا في يافا و ازغر مارس فيها هكتارين ، عشرين مارس كثر فيهن الخير ، المتعهد بعث عماله وبدل الشاحنه ثنتين، وليمونا وصل آخر الدنيا و طمع فيه الغير ، جابوا الغريب عنا وقالولنا بلدكوا كبيره و كلها خير ،
أحكي يمه، إحكي يا رابعه والله يمه وجهك كان خير!!
أبوي أخذني عل صفد وحبة الرمان فيها بتشبع إثنين ،و أخذني على ملبس نكز قلبي وخفت وحنيت، آه يمه والله مالي أنيت ،آه يمه و انا ازغيره حسيت إني غريبه مش قلتيلي وجهك خير ، آه يمه خذيني عل القدس في الأقصى بدي أصلي ركعتين،و رجعني يابا على مرج ابن عامر ناقزني قلبي والله منا عارفه ليش ،خذني يابا على غزة هاشم والله يابا حنيت ، الخير عنا كثير ولسوار عكا حنيت ، بحر قيساريا و آثاره، رجعني يابا على دارنا أنا مش حاسه اني بخير،!!
أحكي يمه ،إحكي يا رابعه والله يمه وجهك خير!!
خذني يابا على بحر يافا اشتهيت أكلة سمك مثل سمكك يا يافا ما إشتهيت خذني يابا عل الخليل في الحرم عمري ما صليت ،و على بيت لحم مطرح ما مشى النبي زكريا ،و العذراء مريم هزة جذع النخله ،سورتها في القرآن علمني إياها الشيخ،واتنفس هواها يابا مطرح ما تنفس سيدنا المسيح ،،والله منا عارفه ليش ،رجعني يابا على دارنا انا والله يمه لدارنا حنيت !!
ليست هناك تعليقات:
إرسال تعليق